ശംഖ്

വികാരവിചാരങ്ങള്‍ മരിച്ചുമരവിച്ച ദേഹിയെ

വ്യക്തിയെന്നഭിസംബോധന ചെയ്ത പ്രിയപ്പെട്ടവളേ,

നിനക്കു ഞാനൊരു വെളുത്ത ശംഖ് 

സമ്മാനിക്കാം...ഒപ്പം, അതിനുള്ളിലൊളിപ്പിച്ച

ആര്‍ത്തിരമ്പുന്നൊരു കടലും!

ആ ശംഖ് കാതോടുചേര്‍ത്താലൊരു 

ഇരമ്പല്‍ കേള്‍ക്കാം, കൂടെ നേര്‍ത്തൊരു മൂളലും,

വക്കുകെട്ടിയ മണ്‍കലങ്ങളില്‍

തളയ്ക്കപ്പെട്ട കോടിക്കണക്കിനാത്മാക്കളുടെ

നിലവിളികള്‍!

ഒരുപാടു ജീവിതങ്ങളും മരണങ്ങളും

ലോകമറിയാതൊളിപ്പിക്കുന്ന കടലിനെയറിയണം,

ആഴങ്ങളില്‍ മുങ്ങിത്താണ്

കൂട്ടുകൂടാന്‍ ആത്മാവിനെയുരിഞ്ഞെറിഞ്ഞ്

അറിയാതറിയണം!

ആരും കാണാതെ, അറിയാതെ

ആഴിയുടെയാഴങ്ങളിലൊരു ശംഖിലൊളിപ്പിച്ച്,

സ്വത്വത്തെയാ കടലിലലിയിച്ച്,

മൂന്നാംനാള്‍ ആകാശമറിയാനുയര്‍ത്തെണീക്കണം!

പുനര്‍ജനിയായി!!