കാരണങ്ങളില്ലാതെ ആത്മഹത്യ ചെയ്യുന്ന പെണ്‍കുട്ടി

ഒരുപക്ഷേ,
സ്വപ്നത്തിൽ നിന്നുണർന്ന് അവൾ ആത്മഹത്യ ചെയ്തേക്കാം...

അല്ലെങ്കിൽ കുളിച്ചുകൊണ്ടിരിക്കേ...

അതുമല്ലെങ്കിൽ ഉറങ്ങുന്നതിനിടെ... 

ചിരിച്ചുകൊണ്ട്... 

പാടിക്കൊണ്ട്... 

സ്വപ്നം കണ്ടുകൊണ്ട്... 

കാരണങ്ങൾ തേടി ലോകമലയുമ്പോൾ

അവൾ അവരുടെയൊക്കെയിടയിലൂടെ 

കിലുകിലെ ചിരിച്ചു നൃത്തം ചെയ്യുകയാവാം!

ശ്രദ്ധിച്ചു നോക്കൂ... 

കാരണങ്ങളിൽ നിന്നും കാരണങ്ങളിലേയ്ക്ക്‌ ഊളിയിട്ട് 

അവളെ പിഴച്ചവളും, 

ചതിക്കപ്പെട്ടവളും, 

ഭ്രാന്തിയുമാക്കി ആഘോഷിക്കുന്നവരെ നോക്കി

അവൾ പൊട്ടിച്ചിരിക്കുന്നതു നിങ്ങൾ കേൾക്കുന്നില്ലേ?? 

എനിക്കു കേൾക്കാം!

ഇനി മുതൽ നിങ്ങൾക്കും കേൾക്കാം 

അവളുടെ കുപ്പിവളക്കിലുക്കവും, 

പാദസ്വരമുഴക്കവും, 

പൊട്ടിച്ചിരികളും!

പെട്ടെന്നൊരു രാത്രി നിങ്ങളുടെ ചുവരുകളിൽ 

കവിത കോറിയിട്ടിരിക്കുന്നതു കണ്ടാൽ, 

ചീന്തിയെടുക്കപ്പെട്ട പുസ്തകത്താളുകളിൽ 

അക്ഷരങ്ങൾ നിറഞ്ഞുകവിഞ്ഞു 

ചുരുണ്ടു നിലത്തു കിടക്കുന്നതു കണ്ടാൽ, 

ഓർമിക്കുക, 

അതവളാവും!

ചിലപ്പോൾ പുലർച്ചകളിൽ 

നിങ്ങളുടെ വസ്ത്രവിളുമ്പിൽ അവളുടെ കരിമഷിയോ, 

കിടക്കവിരിപ്പിൽ അവളുടെ കരിവളപ്പൊട്ടുകളോ കണ്ടേക്കാം... 

ഇനി ചുണ്ടിൽ ചോരച്ചുവപ്പു കണ്ടാലും, 

നെഞ്ചിൽ നഖക്ഷതങ്ങൾ കണ്ടാലും ഭയക്കേണ്ട, 

അതവളാവും,

ചിരിച്ചുകൊണ്ട് ആത്മഹത്യ ചെയ്യുന്ന പെണ്‍കുട്ടി!