നീ...

സ്വപ്നത്തില്‍നിന്നു ഞാനുണര്‍ന്നു നോക്കുന്നത്
നിന്നിലേയ്ക്കാണ്...

നിന്‍റെയോരോ ചോദ്യവും തടുക്കുവാനായി 

ഞാന്‍ വീണ്ടും ഉറക്കം അഭിനയിക്കുന്നു.

എന്‍റെ കണ്ണുകള്‍ക്കു പിന്നിലെ
അസ്വസ്ഥതയുടെ കൂരമ്പുകള്‍ നിന്നിലെല്‍ക്കാതിരിക്കാന്‍
ഞാന്‍ കണ്ണുകളിറുക്കിയടയ്ക്കും.

അപ്പോള്‍ നീ കരുതും ഞാനേതോ ദു:സ്വപ്നം കാണുകയാണെന്ന്.

എന്നെ നിന്നിലേയ്ക്കു ചേര്‍ത്തു പിടിച്ചു 

നീയെന്‍റെ മുടിയിഴകളില്‍ വിരലോടിക്കുമ്പോള്‍ 

ഞാന്‍ മനസുകൊണ്ട് കുതറുകയാവും,
ഒന്നോടിയൊളിക്കാന്‍...

നീയെന്‍റെ പേര് വിളിക്കുമ്പോള്‍, 

നിന്‍റെ കണ്ണുകളിലെ പ്രണയത്തിന്‍റെ ആഴിപ്പരപ്പില്‍ വീണു 

ശ്വാസംമുട്ടി കൈകാലിട്ടടിക്കുമ്പോള്‍, 

ഇന്ദ്രിയങ്ങളോരോന്നും തകര്‍ന്നുപോയിരുന്നെങ്കിലെന്നു

ഞാന്‍ വ്യാമോഹിക്കും.

എന്നിലെ നികൃഷ്ടജീവിയെ തിരിച്ചറിയുന്ന നിമിഷത്തിനപ്പുറം 

നീയുണ്ടാവില്ലയെന്ന ബോധ്യമെന്നെ ഭയപ്പെടുത്തുന്നു.

നിന്‍റെ ദുര്‍ബലമായ ഹൃദയത്തെ
എന്‍റെ കൈക്കുമ്പിളില്‍ ഒളിപ്പിച്ചു വയ്ക്കാന്‍
എനിക്കു കഴിഞ്ഞിരുന്നെങ്കില്‍... 

ഞാനാരാണെന്ന തിരിച്ചറിവിനെ അതിജീവിക്കുവാന്‍ 

നിനക്കാവുമായിരുന്നെങ്കില്‍...